Der binnen gonnent dij heuren t haile dag: stemmen ien kop. Liekt mie n heul biezundere ervoaren, mor as t even kin "laiver nait". Joen schoonmoeke zal der mor maank zitten! Nee, onnerwaarp van dit schietstukje is verkaizen. Of beder nog, reden woarom wie stemmen: vertraauwen. Wat mie aangait n nareg woord, omreden t zo subjectief is as dikte van kloten van n bol, mor t dutter aaldernoast tou. Democratie draait ter aiglieks allineg mor om. Simpel: boazen van ons laand kaizen wie omreden wie vertraauwen dat zai doun wat zai touzeggen (en nait om schier snoetje: aans was Bakellende nooit kozen). Liekt mie hail slicht principe. Woare t nait dat mins verrekte beroerd is ien t ontholden van zo ongeveer aal, behaalven dat e vreten, zoepen, braaien en toepen mot. En doar moakt politicus smieteg gebroek van. Hai reudelt benoam veur verkaizen wat schiere algemaine proat, wordt kozen, en dut 4 joar laank wat e zulf ien kop het. En da's maistied nait wat e kaizer touzegd het. Sums omreden dat e t vanteveuren nait wos, of omreden dat e nait loos genog is, mor maistied omreden dat e lugt. Ok n hail gewoon trekje van n mins, benoam zai dij macht hebben en benaauwd binnen dat te verlaizen. Ien Holland zeggen ze nait vergeefs "macht corrumpeert". Nee, homo politicus is omreden dat e politicus is, n mins dij macht noajoagt, en dus nait te vertraauwen. Bewies stait 3 juni op n aner blog: http://www.financieel-groningen.nl/2010/06/media-en-politiek-2/#more-455. Marc is n politicus dij maint dat journalisten heur dikste toak is t controleren van belkerij van politici. Impliciet zegt hai dus dat politicus nait te vertraauwen is. Hé, toch nog n eerlek politiek mins! Schane dat zien redenoatsie nait klopt. Mor ach, doar is e din weer politicus veur. En as je wat prakkezaaiern over dit 4joarleks baltsgedrag, om mor even retour noa kop van dit schietwaark te goan, is t aiglieks hail singulier dat wie nog aal zo massoal goan stemmen.