T mot moar ains zegd worden. Dizze kerel is ondernemer van affeer. Nait as je fiskoale zuster van roel leuven maggen. Zai vindt mie n zzp-er, mor dat zug k aans. Enfin, as ondernemer he'k n smieteg handicap: k heb n blind oog. Dat moakt mie votdoadelek beste ondernemer onner ale blinne ondernemers. N lutje beetje keuneg aiglieks. En zunder aal te beschaaiden te wezen, t klopt haile best. K wait verduveld goud wat ondernemen betaikent en hou of dat waarkt (kuch). Schane aiglieks da'k dat kompelment nait aan aal nait blinde ondernemers geven kin. Gustern weer mit n stel sproken dij n schier stoetje verdainen, mor nog nooit mit kees. Zai hadden biester waineg kennis van zoaken, nait van zins heur te verdaipen ien materie en omreden zai boas binnen, waren zai ok te aigenikkeg om van n aner wat te leren. Zo is dizze ondernemer nait. K lees geern schietverhoalen van kollega-ondernemers. Kin k wiezer van worden. Van veumirreg he'k nog wat lezen: http://www.financieel-groningen.nl/2010/06/vasthouden-of-durven-loslaten-2/. Doar werd k wel wat krebenteg van. Wat n roar stuk. Ain dij maint dat ien slechte tieden n ondernemer niks doun kin aan vaaste kosten, mor wel aan flexibele kosten, het t bie mie aal verschoten. Ain. Flexibele kosten haiten varioabele kosten. Twij. Varioabele kosten binnen maistied verbonden aan waark, dat kin ien slechte tieden gain probleem wezen, t binnen juust de constante kosten dij as n meulnstain om nek van zzp-er hangen. Doar moat hai wat aan doun. Dikke woagen votdoun en n lutje kopen. Gain fancy ketoor, mor thoes waarken. Kerel toch, hest ter nait veul kiek op. En din t stuk zulf. As je t mie vroagen n bult algemain gebloat. As t tegenzit, din kan dat toch doezend oorzoaken hebben? En der mot opholden da's toch n keuze dij hail situoationeel is? As k deur klik noa webstee van beste Emile huif k nait meer aan mien wodder te vuilen wat of der loos is. Dizze beste man is ondernemer dij zien sinten verdaint met minsen helpen bie veraandern. Pure rekloame aiglieks. Stuk gait bliekboar over homzulf. K zal t hom nait kwoalek nemen. Hai wait nait beder. Redaksie wel. As zai lezers willen, din motter ok wat te lezen wezen.