As t om mien jongen gaait din is ain van dikste grootbrengadagia “waje der nait ienstoppen, komt der wis nait oet”. Wat nait zeggen wil dat waje der wel ienstoppen, der ok weer oetkomt, mor kaans dat doar iets van hangen blieft ien lutje kienderkopke is dikker. Zo waarken ollu deur tot lutjen groot binnen. En as je noa mainen van joen aigenste kroost nuver waark oafleverd hebben wat grootbrengen aanbelangt, din wor je doarveur daankt. Mainste kiender doun dat aal op moekedag. N olle tredietsie. T gaait om noa middelaiwen en het zien oorsprong ien t gristelk gleuf. Poapsen binnen der mit begonnen om zo dounde Maria te eren. Loater is dat t feestjen om ere van t moekewezen worden. Non binnen der kiender dij nait feestjen willen omreden, het is n feest veur detailhandeloaren, mainen zai. Da’s n dikke drogreden, liek datter veul iezer ien spinoazie zit. Dit slag volk is te veul drok mit heurzulf en hebben gain wait van bedanken. Gain wait van muite doun om n aner even blied te moaken. Mit Poasken, Sunnerkloas en Karsttied heur je heur hier toch ok nait over kloagen? Nee, din kinnen zai zulf oet reep mit vreten. Ok binnen der gonnent dij heur der geern makkelk van oafmoaken. Zo ok dat wicht van t kiendernijs op tillevisie. Moeke n beste moekesdag wìnsen ien oetzenden, ofwel tiedens waark, mit boas zien sinten! Asof dat muite kost. Drogreden of nait, aiglieks kin je t dizze minsen nait kwoalek nemen dat zai mit oetbedenksels aankommen om mor niks aan moekesdag te huiven doun. T zal voak aan grootbrengen deur moeke zulf legen hebben. Waje der nait ienstoppen, kin der ok nait ienkommen. En “woar ain gain wait van het, kin e ok nait deurgeven” is ain van mien aner liefspreuken. Gelukkeg blieven mainste aigenhaimers kienderloos.

Wat bezielt n kunstenoar om kunstenoar te worden? Dat mouten wol persoonleke driefveren wezen. Omreden, kaans om goud sinten te verdainen as kunstenoar is even dik as miljonair worden mit n stoatslöt. Buussinten, dat schoeft t veur mainste kunstenoars. Toch binnen der veul minsen dij heur kunstzinneg utern mouten. Schilder, beeldhaauwer, balletdaanser, enzowieder. Zai hebben gemain dat zai heur gevoul omzetten ien n scheppende aktiviteit (1) en dat zai geern erkend worden willen (2) deur aner lu. T schoapen mout beruiren, laifst dat n gloazen oog der van brollen mout. Mor mainst gaait t kunstenoar der om dat e herinnerd wordt. Laifst tot laank na zien dood (3). Ain van schierste vörmen van erkennen is as n kunstenoar gewoar wordt dat aner minsen zien waark noadoun, noabaauweln. Neem n schier moppie meziek. Din is t hail gewoon dat lu dat noaspeulen doun. En ok mit n taiken is noataiken hail gewoon (wel maank lientjes blieven). Veur schriever gaait dizze droak nait op. Doar is t aansom. Noaschrieven van tekst hait straf. En bie schrieven van n veurlezen verhoal -ok wel dictee nuimd- kieken wie benoam noa fouten en nait hou goud of t is. En aargste van haile spul is dat veul schrievers haildaal gain wait hebben houveul minsen heur teksten lezen, loat allineg, watof zai der van vienden! Aarme schriever, bist mor n haalfbak. Wel scheppen, mor gain feedback, dus gain erkennen. Mouten wie meelie mit die hebben? Haildaal nait. Dit waitende bist per definitie ainegst ien zien soort. Ainegste kunstenoar dij nait noabaauweld wordt. Da’s genog om n schriever te herinneren. En doar was t toch allineg mor om te doun?

Houveul ambietsie mout n mins hebben? Da’s n stoere vroag. Mor wel ain dou der tou dut. Op t pladdelaand teminnent. Omreden, doar lopt t volk vot. En der komt gain nij volk bie. Krimp. As der wat was om veur te blieven, din bleven minsen wol mainen zai. Dus trekken ze vot. Op veul steeën van ons Grunneger pladdelaand is t nait aans. Aiglieks is t ien bepoalde houken haile slim. Delfziel reken k even nait mit, da’s korstleden hoog klommen en dus ok snel valen, mor ien houken van Oldambt is t nait best. Veur minsen dij der wonen is t schienboar makkeleker om vot te goan, as der wat van te moaken. Lack of ambition as je t mie vroagen. As iets veur joe van weerd is, din bin je toch bezeg dat teminnent te loaten blieven zoas t is? Laifst moak je t nog schierder. Oldambt het gain beste tredietsie as t om ambietsies gaait. Doar zeggen minsen t laifst allineg mor nee. Zulfs tegen wiendmeulens. Doar wordt t gèlle laandschop minder van. En doar holden minsen dij der wonen juust zo geern van. Dij wiedte, da’s schienboar heur ambietsie om wat van te moaken. Dus zeggen zai nee integen gruine stroom van wiend. Ien Den Hoag zit ok ain mit ambietsies. Dij maint datter haile best nije wiendmeulens op Grunneger dieken maank Eemshoaven en Lauwersoog ploats worden kinnen. Stoef bie Waddenzee, wereldaarfgoud. Stoef bie kwelders, nasjieonoal cultuurhistories aarfgoud. As krimp ien t Oldambt nog even deurzet, din wait k n haile beste stee woar aal dij ambiesties -leeg en hoog- soamen kommen kinnen.

Niks is wat t liekt. Zo is doar t onnerschaaid maank kerels en vraauwlu. Twij groepen dij heur geern nog weer onnerverdailen ien lutje liekstemde groepkes. En doar kriegt aner geslacht gain vat op. Benoam nait as der n rad ien t spul is. Nait bie n spel mit n bal. Doar is t hail gewoon dat wichter en jongen t zulfde doun, of zulfs soamen doun. Mor nait bie groepkes mit baanden. Hebben joe wel ais n vraauw zain as MC Dikke Pier op heur ploffen veurbie neudeln? Echt nait. N bos holt heurt nait op n Harley. Zulfde bie ongemotoriseerde twijwielers. Wielrenverainen binnen ok nog jechtege mannenbolwaarken. Mor wel n biezundere. Dit binnen mannen dij aiglieks n aner wezen willen. Aans gaait ain toch nait mit rekloame van n aner rondfietsen? K kin allineg mor lutje jongen en bezopen hampels dij ok ien shirts van heur voetbalcluppie mit rekloame lopen. En dat scheren van heur bainen is netuurlek n verrekte verwiefde boudel. En din doping: da’s bliekboar neudeg aans het n fietser haildaal gain spieren. Nee, k bin der wel oet, wielrenners binnen aiglieks wichter ien n onmis lief. Dat is ok reden dat wie aal voaker wichter mit zain fietsen ien t peleton. Gezellig mit nkander keuvelnd komt t groupke din veurbie, woarbie ain spril makkelk t aner geslacht herkennen kin aan stee van bobbel maank stuur en zoadel. Bikersbolwaark bliekt n safe haven.

Wel kint ze nait? Dij kobbels dij aansom binnen. Stellen woarvan vraauw boas is en manspersoon t wiefke. Mainst kienderloos, omreden zai wil heur aigen dingen blieven doun. Doar pazen gain lutje jongen bie, doar het zai haildaal gain tied veur. Manskerel sloekt dat, omreden hai mot toch ok zien kwakje kwiet. Dus koerelt hai mor wat mit heur om. Din is kaans op n moal lozen t dikst. En zo is n verstaarkend proces geboren dat n moal knappen zal. Kiek, t mag din wel lieken dat bremster en mister poets bienkander pazen, mor da’s nait zo. Omreden, zai het gain hazzes en hai geen roggegroat. As hai n moal voetballen op tillevisie kieken wil (zoas gustern woar k bie was, t was leste speuldag), din wil zai dat nait hebben. Omreden zai is drok mit aans wat, ergo hai mout koken. Dat e dat gustern ok aal doan het dou zai heur aigen slingerboudel haar, dat dutter nait tou. Ok nait dat zai haile mörn oetsloapen het en hai hoes aan kaant moakt het. Nee, boasvraauw denkt as n vraauw. Mit emootsie en nait mit snöt. Tillevise blieft oet en hai gaait mor weer maank zien potten en pannen om t eten kloar te maken. Eerliek is eerliek; hai is ok nait loos genog om ien te zain dat as e wat veur homzulf wil, hai heur òf paaien mout mit wat lekkers noatied (kriegst wat sukkeloa van mie laiverd) òf zien waark en privé zoaken beder mot leren soamen te loaten goan (k heb mie nijste digitoale tillevisie kocht, smieteg veur ien keuken). Zoas t ter non bieligt veurspel k n schaaiden. Zai moaktter n ìnd aan. Zai het veuls te waineg tied veur heurzulf.

Maaimoand is aal weer n poar doagen old. T feestjen is ok aal hìngoan. Op nij maai trappen wie t festival faitlieks oaf mit n joardag en bliedschop over weer n joar aarbaiden. Vandoag is der din even tied veur wat old oorlogstreur, mor mörgen gaait t feestjen haildaal lös mit veule bevrijdensfestivals. Noa dij tied kriegen wie nog Hemelvoart en Pinster, onze gristeleke feestdoagen, mit wien, weiber und gezang op diek. En aal dij tied mot boudel der smui oetzain, zowel binnen- as boetenshoes. Mor dat wil bie ons mor dails lukken. Omreden, mien grasmesjien is stokkend. Pork wil doagleks mor n poar menuten snieden en din schaaidt e der mit oet. Gain biester schiere oetkiek, zo’n lapke gras veur t hoes mit boanen van aner lengte. Zit onnerwiel ok nog veul krödde ien. Joe kinnen wel oetstokken dat van dieverdoatsie bie ons ien hoes gain sproake was. K heb gustern mien grasmesjien verkocht en n schoap weerom noa hoes nommen. Mien gazon zugt ter non weer pico bello oet. En t basit ok. En van winter, as grui oet gras is, feestjen wie thoes gewoon wieder. Mit patat en n beste bak shoarma.

Der binnen entrepreneurs dij haile veul verdainen. En der binnen der bie dij gain kloten verdainen. Wil dat zeggen dat onnernemer dij n bult sinten bienkander kraapt ok beste onnernemer is? As t ainegste criterium succes is, din aal. Mor succes hebben mainste minsen omreden zai binnen loos. Nait zo zeer affeervoardeg. T gaait mainsten joa ok nait om goud wezen, mor om sinten verdainen. Toch? Mainste boazen binnen om dij zulfde reden ok gain besten. Ain dij zien bek goud gebroeken kin en ien gelegenhaid is, dij proat hom aal rad op n boasstek. En krieg hom din mor weer ais vot. Mien stellen is dat 8 van 10 boazen beroerde boazen binnen. Da’s gain waitenschop, mor ervoaren. Desondanksindiervoege is heur verdainste n veulvoud van wat mainste minsen moandelks aan sinten kriegen veur heur aarbaid. T mainst singuliere is dat t gehail n zoak van positie is en dat t gain kloten van doun het mit belaangrieke zoaken as verantwoordelekhaid. Kiek n buschauffeur verdaint modoal en motter veur zörgen dat zien varreg passagiers rit overleven. Boas het meschain ok wel varreg man onner hom, mor hai is nait ien stoat om vanoet zien waark wat verkeerd te doun mit dood van zien waarklu (of klandizie) tot gevolg. Hai kin hoogoet wat sinten kwietroaken. Omreden, boazen der dus nait tou doun, mouten zai aiglieks waineg verdainen. Minder as n buschaufefeur. En as zai noa verloop van tied zoak beder aan loop kregen hebben, din stait doar n schikkelke belonen tegenover. Eerst bewiezen en din verdainen. Veurdail van dit verdainstenbeleid, allingen minsen dij mainen dat zai goud boas wezen kinnen, duurven dit aan. Dat binnen echte entrepreneurs. Welke entrepreneur het n goud idee wat te doun mit dij aner 80%? Verdainsten noa vermogen.

Schriever dizze schietboudel is best wel pro veuroetgaang. Nait wat aal aangaait, mor wel van veul. Aal dat nijs kin k haile best volgen. Nait aal minsen holden der van as zoaken nijmoods worden. Baanklu of accountants bieveurbeeld. Dij binnen duvels conservatief. Mor aaltemet nog ollere zoegerds binnen softwaremoakers. Haildaal bedrieven dij administroatsiepakketten moaken woar accountant weer mit waarken mot. Zo krieg k elk joar n nije licentie veur mien administroatsiepakketje. Zo ok dit joar. Mor nije licentiecode waarkt nait. Pakket wil om dij reden ok nait meer waarken. Bellen mit bokjestoandersbalie van softwarebedrief. Och mien laive tied pot. Joe mouten upgraden noa n nije versie, din waarkt boudel weer. Op onze site kin je bestanden hierveur downloaden. Binnenhoalen, unzippen dij boudel en setuppen mor. Weer n foutmelden. T wil weer nait. Setuo wordt oafbroken en aal mien bestanden binnen onnerwiel overschreven en dus vot. Loos as k bin he’k n backup moakt. Mor weer bellen mit t behulpzoame ding achter tillefoon. Tsja, da’s n minne boudel. Loat mie even prakkezaaiern. Waitie wat we doun goan (k maint zai)? Wie kwakken ol boudel vot, k geef joe nij versie en moak bestanden ok even veur joe kloar. Noa vief van mien kostboare uren à raison 100 euro t stuk as k ze verkopen kin, is t lukt om software dij k aal n zet leden betoald haar weer aan proat te kriegen. Gevalletje verandern woar k nait om vroagd haar. Gustern is vraauw 44 joar worden. Gevalletje mutatis mutandis dij k elk joar biebainen kin en ok weer noa oetkiek. 

Ien tieden van Romeinen was t hail gewoon dat boas hom toejuichen laid. Niat dat elknain kerel zo geern mog, mor wat n dieverdoatsie veur plebejers as kaizer laiwen soamenbrocht mit wat voutvolk dij e kwiet mos. Laiwen binnen wie ien t heden kwiet worden, mor tot Juliana was t hail gewoon om noa boas te goan en heur bie t défilé te bedaanken mit blommen en laider veur heur boaswezen. T ol wicht noa heur dij zo veul tegenslag het mit heur femilie is loos as n boas west. Zai zag aal vro dat minsen aal meer individualiseren. Dus haar zai oetstokt dat zai noa minsen touging om heur te bewieroken loaten, ien ploats van aans om. Zai was stoef bie t volk. Dat boas laangs komt moakt minsen blied. Dij loaten heur geern zain watof zai eten en watof veur dieverdoatsie zai kennen. Asof zai van n aner planeet komt en gain wait het watter loos gait. En dat joar noa joar as zeem van Sorbo. Zolstter hoast n board van kriegen. Zo nait ons boas-to-be. Dij het deur dat n potje schietpotsmieten n haile beste investeren is ien boas blieven. Mot wel n goije keuneg worden.